ಅರಮನೆ ಮೈದಾನದಲ್ಲಿ ನಡೆದ ರಾಮಕಥಾ ದ್ವನಿಸುರುಳಿ

ಎರಡನೆಯ ದಿನದ ಪ್ರವಚನಕ್ಕೆ ಪೂರಕವಾಗಿ:
ಯಾವ ಮೋಹನ ಮುರಳಿ ಕರೆಯಿತು – ಹಾಡು ಪರ-ಭಾವಗೀತೆ ಆಗಿರಬಹುದೆಂಬ ಕಲ್ಪನೆ ಇರಲಿಲ್ಲ.. ಬಹಳ ಚೆನ್ನಾದ ವಿವರಣೆ.
ಇಂಥದ್ದೇ ಅಪಾರ್ಥಕ್ಕೊಳಗಾದ ಇನ್ನೊಂದು ಪದ್ಯ ಮನಸ್ಸಿಗೆ ಬಂತು,

ಡಾ. ರಾಜ್ಕುಮಾರ್ ನಟಿಸಿದ ಬಭ್ರುವಾಹನ ಸಿನಿಮಾದಲ್ಲಿ ಈ ಹಾಡನ್ನು ಬಳಸಿಕೊಳ್ಳಲಾಗಿದೆ.

ಆರಾಧಿಸುವೆ ಮದನಾರಿ
ಆಧರಿಸು ನೀ ದಯೆ ತೋರಿ || ೨

ಅಂತರಂಗದಲಿ ನೆಲೆಸಿರುವೆ
ಆಂತರ್ಯ ತಿಳಿಯದೆ ಏಕಿರುವೆ
ಸಂತತ ನಿನ್ನ ಸಹವಾಸ ನೀಡಿ
ಸಂತೋಷದಿಂದೆನ್ನ ನಲಿಸೆಂದು ಕೋರುವೆ

ಆರಾಧಿಸುವೆ ಮದನಾರಿ

ಮೈದೋರಿ ಮುಂದೆ ಸಹಕರಿಸು
ಆ ಮಾರನುರವಣೆ ಪರಿಹರಿಸು || ೨

ಪ್ರೇಮಾಮೃತವನು ನೀನುಣಿಸು
ತನ್ಮಯಗೊಳಿಸು ಮೈಮರೆಸು
ಚಿನ್ಮಯ ಭಾವ ತುಂಬುತ ಜೀವಾ
ಆನಂದ ಆನಂದ ಆನಂದವಾಗಲಿ

ಆರಾಧಿಸುವೆ ಮದನಾರಿ

ಯಾವ ಪುಣ್ಯ ಘಳಿಗೆಯಲ್ಲಿ ಈ ಹಾಡು ರಚಿತವಾಯಿತೋ?? 🙂
ಯಾಕೆ ಹೀಗೆಂದೆನೆಂದರೆ,
ಈ ಪದ್ಯದಲ್ಲಿ ಕೇವಲ ಒಂದು ಶಬ್ದದ ಅರ್ಥವಿವರಣೆ ಇದಿಯ ಹಾಡನ್ನೇ ಬದಲಿಸಿಬಿಡುತ್ತದೆ. “ಮದನಾರಿ” ಎನ್ನುವ ಪದ ಹೆಣ್ಣಿಗೆ ಹೇಳಿದ್ದಾದರೆ, ಪ್ರಿಯತಮ ತನ್ನ ಪ್ರಿಯತಮೆಗೆ ಹೇಳುವಂತಿರುವ ಹಾಡು ಅತಿ ಶೃಂಗಾರ ರಸ ಭರಿತವಾಗಿದೆ,
ಅದೇ, ಒಂದುವೇಳೆ,
ಮದನ+ಅರಿ=ಮದನಾರಿ (ಕಾಮನ ವೈರಿ, ಕಾಮನನ್ನೇ ಮಣಿಸಿದ ಶಿವದೇವರು) ಎಂಬ ಅರ್ಥದಲ್ಲಿ ಓದಿದರೆ, “ನೀ ಬಂದು ಸಲಹೆಯಾ ಪ್ರಭೂ” ಎಂದು ಕೇಳುವಂತಿಲ್ಲವೇ?
ದೇವರು ಒಲಿಯಲೆಂಬ ಭಕ್ತನೊಬ್ಬನ ಮನದಾಳಾದ ಬಯಕೆಯು ಲೋಕದ ಕಣ್ಣಿಗೆ ಅನಂಗನರಮನೆಯ ಅಂತಃಪುರದ ಗೀತೆಯಂತೆ ಚಿತ್ರಿತವಾಗಿದ್ದು ವಿಚಿತ್ರ 🙁

ಮೋಹನ ಮುರಳಿಯ ಗಾನದೆಡೆಯಲ್ಲಿ ಈ ಹಾಡು ನೆನಪಾಯಿತು..
ಹರೇ ರಾಮ 🙂