1-1-2010 – ರಾಜಸ್ಥಾನದ ಯಾತ್ರೆ – ಭೀಲ್ವಾಡದಿಂದ ಉದಯಪುರದ ವರೆಗೆ

ಜ.೧ – ಇಂದು ಯಾತ್ರೆ ಭಿಲ್ವಾಡಾದಿಂದ ಸಹಾಡಾ, ರಾಜಸಮಂದ (ಕಂಕ್ರೋಲಿ), ನಾಥದ್ವಾರ – ಉದಯಪುರಕ್ಕೆ ಬಂದು ತಲುಪಿತು.

ಸಹಾಡಾದಲ್ಲಿ ಒಳ್ಳೆಯ ಸ್ವಾಗತ ಕಾರ್ಯಕ್ರಮ ನಡೆಯಿತು. ಮುಂದೆ ಕುಂವರಿಯಾದಲ್ಲೂ ಒಳ್ಳೆಯ ರೀತಿಯ ಸ್ವಾಗತ ನಡೆಯಿತು.

ಯಾತ್ರೆ ಮುಂದುವರೆದು ರಾಜಸಮುಂದ (ಹಿಂದಿನ ಹೆಸರು ಕಂಕರೋಲಿ)ವನ್ನು ಸೇರಿತು. ನಗರದಲ್ಲಿ 4 ರಿಂದ 5 ಸಾವಿರ ಜನ ಸ್ವಾಗತ ಶೋಭಾಯಾತ್ರೆಯಲ್ಲಿ ಪಾಲ್ಗೊಂಡಿದ್ದರು. ಬಾಲಕೃಷ್ಣ ಸ್ಟೇಡಿಯಂನಲ್ಲಿ ನಡೆದ ಸಭಾ ಕಾರ್ಯಕ್ರಮದಲ್ಲಿ ಸಂತ ರವಿದಾಸ ಜೀ ಮಹಾರಾಜ್ ಅವರು ವೇದಿಕೆಯಲ್ಲಿ ಉಪಸ್ಥಿತಿ ನೀಡಿದ್ದರು. ಮೊದಲಿಗೆ ರಾಜಸ್ಥಾನ ಪ್ರಾಂತ ಸಂಯೋಜಕರಾದ ಕೈಲಾಶ ಜೀ ಅವರು ಯಾತ್ರೆಯ ಬಗ್ಗೆ ವಿವರಣೆ ನೀಡಿದರು. ನಂತರದಲ್ಲಿ ದಿಲ್ಲಿಯ ವ್ಯವಸಾಯಿ ಶ್ರೀ ಅಲೋಕಗುಪ್ತ ಅವರು ದೇಶೀ ತಳಿಯ ಹಸುವಿನ ಹಾಲಿನ ವಿಶೇಷತೆ ಹಾಗೂ ಇತರ ಹಾಲಿನಲ್ಲಿರುವ ಅವಗುಣಗಳನ್ನು ವಿವರಿಸಿದರು. ವಿ.ಹಿಂ.ಪ.ನ ಅಂತಾರಾಷ್ಟ್ರೀಯ ಉಪಾಧ್ಯಕ್ಷ ಶ್ರೀ ಹುಕುಂಚಂದ್ ಜೀ ಸಾವ್ಲಾ ಅವರು ಗೋವಿನ ಭಾವನಾತ್ಮಕ ವಿಷಯಗಳನ್ನು ತುಂಬ ರಸವತ್ತಾಗಿ ವಿವರಿಸಿದರು.

ಯಾತ್ರೆ ಮುಂದುವರೆದು ಪ್ರಸಿದ್ಧ ವಿಷ್ಣುಕ್ಷೇತ್ರ ನಾಥದ್ವಾರವನ್ನು ಪ್ರವೇಶಿಸಿತು. ಬೃಂದಾವನದಿಂದ ಶ್ರೀಕೃಷ್ಣನ ಒಂದು ಮೂರ್ತಿ ಇಲ್ಲಿ ಬಂದು ಪ್ರತಿಷ್ಠಾಪನೆಗೊಂಡಿದೆಯೆಂದು ಪ್ರತೀತಿ.

ನಾಥದ್ವಾರದಲ್ಲಿರುವ ಗೋಶಾಲೆಯನ್ನು ನೋಡಲು ಹೋಗಿದ್ದೆವು. ತುಂಬ ಒಳ್ಳೆಯ ರೀತಿಯಲ್ಲಿ ಗೋವುಗಳನ್ನು ನೋಡಿಕೊಳ್ಳುತ್ತಿದ್ದಾರೆಂದು ಗೊತ್ತಾಗುತ್ತಿತ್ತು. ಅಲ್ಲಿನ ನಂದಿಗಳ ಸೌಂದರ್ಯ ಹಾಗೂ ದೇಹದಾರ್ಢ್ಯವನ್ನು ನೋಡಿಯೇ ಆನಂದಿಸಬೇಕಷ್ಟೇ.

ಯಾತ್ರೆಗೆ ಉದಯಪುರದಲ್ಲಿ ಅಭೂತಪೂರ್ವ ಸ್ವಾಗತ ದೊರೆಯಿತು. ಸುಂದರ ಗಿರಿಕಂದರಗಳಿಂದ ಆವೃತವಾದ ನಗರಿ ಉದಯಪುರ ಸಭೆಯಲ್ಲಿ ಅಂದಾಜು 2000 ಜನರು ಸೇರಿದ್ದರು. ಮಹಿಳೆಯರು ತಮ್ಮ ಸ್ಥಾನವನ್ನು ತುಂಬಿದ್ದರು.

ವೇದಿಕೆಯಲ್ಲಿ ಉದಯಪುರದ ಸಂತ ಪೂ. ಸುರೇಶಗಿರಿ ಮಹಾರಾಜ್ ಅವರು ಮೊದಲಿಗೆ ಆಶೀರ್ವಚನ ನೀಡಿದರು. ಶ್ರೀ ಶಂಕರಲಾಲ ಜೀ, ಶ್ರೀ ಹುಕುಂಚಂದ್ ಜೀ ಸಾವ್ಲಾ, ಶ್ರೀ ಅಲೋಕ ಗುಪ್ತಾ ಇವರು ಜನತೆಗೆ ಗೋಮಾತೆಯ ಬಗ್ಗೆ ತಿಳಿಸಿಕೊಟ್ಟರು. ಪೂಜ್ಯ ಸಂತ ಸುರೇಶಗಿರಿಯವರು ಗೋವನ್ನು ರಾಷ್ಟ್ರೀಯ ಪ್ರಾಣಿಯೆಂದು ಘೋಷಿಸುವಂತೆ ಸರಕಾರವನ್ನು ಆಗ್ರಹಿಸಿದರು.